18 красавіка 2013 г. у Мінску пройдзе міжнародная канферэнцыя “Актуальныя пытанні рэалізацыі ў праве прынцыпу забеспячэння роўнасці. Еўрапейскі досвед: ад тэорыі да практыкі”. Арганізатарам мерапрыемства выступае асветніцкая праваабарончая ўстанова “Офіс па правах людзей з інваліднасцю” ў супрацоўніцтве з Фондам Розы Люксембург.
Мэтай канферэнцыі з'яўляецца абмеркаванне актуальных пытанняў дыскрымінацыі і забеспячэння роўнасці людзей з інваліднасцю, іх рэалізацыя ў праве і правапрымяняльнай практыцы, перспектывы развіцця антыдыскрымінацыйнага заканадаўства ў Рэспубліцы Беларусь (стварэння “дарожнай” карты).
Гэтая імпрэза - унікальная падзея для беларускага грамадства. За апошнія гады мерапрыемстваў такога ўзроўню і зместу, якія асвятляюць пытанні дыскрымінацыі, у Беларусі не праводзіліся. Канферэнцыя абяцае стаць менавіта прафесійнай падзеяй нумар адзін у галіне захавання прынцыпу роўнасці. Для працы запрошаны беларускія і замежныя эксперты міжнароднага ўзроўню - юрысты, сацыёлагі, грамадскія дзеячы - з Беларусі, Украіны, Германіі, Францыі. Удзельнікаў чакаюць цікавыя дыскусіі, абмеркаванні, працы ў групах.
“Беларускае заканадаўства, датычнае да інвалідаў, грунтуецца на палажэннях Канстытуцыі Рэспублікі Беларусь і Законах “Аб сацыяльнай абароне інвалідаў у Рэспубліцы Беларусь” і “Аб папярэджанні інваліднасці і рэабілітацыі інвалідаў”, - каментуе сітуацыю каардынатар канферэнцыі, эксперт па правах людзей з інваліднасцю Галіна Крот. - Для рэгулявання грамадскіх стасункаў у той ці іншай сферы жыццядзейнасці інвалідаў прымаюцца адпаведныя заканадаўчыя акты, асаблівы статус інвалідаў адлюстраваны ў больш чым 1500 нарматыўных актах. Але, не гледзячы на тое, што Закон “Аб сацыяльнай абароне інвалідаў у Рэспубліцы Беларусь” забараняе дыскрымінацыю ў дачыненні да людзей з інваліднасцю і гэта парушэнне караецца паводле закону, заканадаўчага замацавання вызначэння “дыскрымінацыя па прыкмеце інваліднасці” ў нацыянальным праве да гэтага часу няма”.
Рабочыя мовы канферэнцыі: руская, нямецкая. На канферэнцыі таксама будзе забяспечаны сурдапераклад.