5 траўня ў Мінску прайшоў мітынг, арганізаваны Рэспубліканскай асацыяцыяй інвалідаў-калясачнікаў (РАІК), у падтрымку міжнароднага руху інвалідаў за роўныя правы і супраць дыскрымінацыі. Каля 100 чалавек з плакатамі казалі пра свае правы, праблемы і пра Канвенцыю аб правах інвалідаў. Сімвалам мітынгу стала котка ў клетцы. «У мяне ўсё добра. Я жыву ў клетцы», – напісана на плакаце. Так і інваліды-калясачнікі часта не могуць нават выйсці з дому, таму што бардзюр вышынёй 1 см. ужо з’яўляецца для іх такой жа перашкодай, як 3-х метровая сцяна для звычайных людзей.
Удзельнікі мітынгу прапанавалі здаровай дзяўчыне-журналісту правесці ў калясцы 2 хвіліны і пераадолець бардзюр на асфальце. Выпрабаванне ўдалося ёй толькі з старонняй дапамогай. Вось такое безба’ернае асяроддзе.
Перад прысутнымі выступілі старшыня ГА «РАІК» Яўген Шаўко і каардынатар Офіса па правах людзей з інваліднасцю Сяргей Драздоўскі. Абодва лідары руху за правы людзей з інваліднасцю заклікалі ўдзельнікаў мітынгу адкрыта і смела казаць пра свае правы і выступаць за падпісанне Канвенцыі аб правах інвалідаў.
Вынікам мітынгу стала падпісанне ўдзельнікамі звароту да Прэзідэнта Рэспублікі Беларусь Аляксандра Лукашэнкі. Інваліды-калясачнікі просяць Прэзідэнта краіны звярнуць асаблівую ўвагу на праблемы людзей з інваліднасцю і асабіста заняцца гэтым пытаннем «Мы вымушаныя звяртацца да вас з заклікам забяспечыць выкананне канстытуцыйных правоў у адносінах да інвалідаў-калясачнікаў Беларусі», – гаворыцца ў звароце. – Беларусі патрэбная Канвенцыя аб правах інвалідаў! І мы просім прыняць яе разам з факультатыўным пратаколам да яе».
